ارىقتاۋ ءۇشىن تاماقتان تيىلۋ ەمەس، دۇرىس تاماقتانۋ ماڭىزدى - كەرۋەن تورابى

ارىقتاۋ ءۇشىن تاماقتان تيىلۋ ەمەس، دۇرىس تاماقتانۋ ماڭىزدى

دۇرىس تاماقتانۋ – ديەتا (تاماقتان تيىلۋ) ەمەس. سىزگە كۇنى بويى سۋ ءىش، قيار جە نەمەسە ءبىر اپتا اۋامەن قورەكتەن دەپ ۇيرەتپەيدى. دۇرىس تاماقتانۋ – كۇندەلىكتى پايدالى ءارى دارۋمەنگە تولى تاعامداردى از-ازدان جانە ءجيى جەۋ. كۇنىنە ءسىز بەس مەزگىل تاماقتاناسىز. جانە «مەندە ديەتا» دەپ اعزاڭىزدى قيناپ، كۇيزەلىسكە سالمايسىز. ءبىزدىڭ اعزامىز وتە اقىلدى. ءسىز «مەن ەندى ديەتا ۇستايمىن» دەپ ميىڭىزعا بەلگى بەرگەن ساتتەن باستاپ اعزاڭىز بولاشاقتىڭ قامىنا كىرىسەدى. اسقازان ۇرەيدىڭ كەسىرىنەن جۇمىس جاسامايدى. ال، ءسىزدىڭ بويىڭىزداعى بارلىق سۋ، وتتەگى ت.ب.ءبارى مايعا اينالادى. ناتيجەسىندە قاتاڭ ديەتانىڭ كەسىرىنەن ارىقتامايسىز. كەرىسىنشە ورگانيزم سترەسس الىپ، سالماق قوسادى.

ال، دۇرىس تاماقتانۋدى ەستىگەن كەزدە ءسىزدىڭ ميىڭىز دا، ويىڭىز دا، اسقازان دا، باسقا دا اعزالارىڭىز اش قالماسىن بىلەدى. سوندىقتان، ولار قىزمەتتەرىن ەش ۇرەيسىز اتقارىپ، مايلاردى ىدىراتىپ، كەلەسى تازا قورەككە دايىندالادى.

دۇرىس تاماقتانۋ ۋاقىتى

بۇل بولىمگە مۇقيات ءمان بەرگەن ءجون. كوپتەگەن قىز- كەلىنشەكتەر كۇنىنە ءبىر مەزگىل تاماقتانادى. ول – قاتە. كۇنىنە ادام بەس مەزگىل تاماقتانۋ قاجەت. تەك ءار ۋاقىتتىڭ ولشەمى مەن شەكتەۋى بار ەكەنىن ۇمىتپاۋ كەرەك.

تاڭعى استى تاستاما

تاڭعى استا بەرەكە مەن ىرىس بار. تەك تاڭعى استا ەمەس، كۇن ۇياسىنان ەندى شىعاتىن ۋاقىتتا نىعمەت كوپ. دانا حالىق كۇنمەن جارىسىپ ۇيىقتاۋدى قولداماۋىنىڭ دا سىرى وسىندا شىعار. تاڭەرتەڭ كۇن شىقپاستان ويانىپ، تاڭعى سەرۋەن جاساڭىز. مىندەتتى تۇردە جۇگىرۋ نەمەسە سپورتتىق جاتتىعۋ جاساۋ شارت ەمەس. ەڭ باستىسى، ءوزىڭىزدىڭ ويىڭىزبەن، نيەتىڭىزبەن وڭاشا قالىڭىز. وزىڭىزبەن ءوزىڭىز سىرلاسىڭىز. جاماندىقتى ويلاماڭىز. ابزالى تۇنگى ۇيقىعا كەتەر كەزىندە ىشتەي بارلىق ادامداردان كەشىرىم سۇراپ، ءبارىن كەشىرىڭىز. تاڭەرتەڭ ەشكىمگە ەشقانداي وكپەسى جوق ميدىڭ دا، جۇرەكتىڭ دە تىنىسى وزگەشە بولماق. دالادا جارتى ساعات ەركىن سەرۋەندەگەن سوڭ جىلى دۋش قابىلداڭىز. جانە ايناعا قاراپ ءوزىڭىزدىڭ سۇلۋلىعىڭىزعا ماقتاۋ ايتتىڭىز.

كوپتەگەن تولىق ايەلدەردىڭ باستى ۋايىمى ارتىق سالماق ەكەنى انىق. كۇندەلىكتى ارىقتاۋ كەرەكپىن، تولىقپىن، سەمىزبىن دەپ وزدەرىن قيناۋ ارقىلى كوپ ەنەرگيا جۇمساپ، ارتىق تاماقتانعانىن بايقاماي قالادى. سول سەبەپتى جاقسى سوزدەر ايتىڭىز، ەركەلەتىڭىز. ماحابباتقا بولەنىپ بولعان سوڭ اس ۇيگە بارىڭىز. توڭازىتقىشتى اشقان كەزدە ويشا بارلىق تاماقتى جەك كورۋ دە قاجەت ەمەس. ەڭ باستىسى، «بۇل تاماقتار مەنى تولىق ەتپەيدى. جانە مەن قازىر تويىپ تاماقتانامىن. ال، اسقازانىما توق بولۋ ءۇشىن مىنا تارەلكەگە سالىنعان اس جەتەدى» دەپ نيەت ەتىپ، اعزاعا سەنىمدىلىك بەرىڭىز.

سونىمەن، تاڭعى استى رەتتەۋگە كىرىستىك. مىندەتتى تۇردە تاڭعى بوتقانى پىسىرىڭىز. پروتسەنتى تومەن ءسۇتتى تاڭداڭىز. ايتپاقشى، كۇرىش بوتقاسىن اۋەلى سۋعا قايناتىپ، ۇستىنە ءسال عانا ءسۇت قۇيىڭىز. ال، تۇز تۋرالى ۇمىتىڭىز. ءبىر ءتىلىم قارا نان، ىرىمشىك، ءسۇت قولدانىڭىز. باستىسى، ىرىمشىكتىڭ ەڭ تومەنگى پايىزدىق ءتۇرىن الىپ قاتەلىككە جول بەرمەڭىز. ىرىمشىكتىڭ پايىزى جوعارى بولسا دا، ارتىق سالماققا ەش قاۋىپتى ەمەس. كەرىسىنشە، تومەن پايىزى اعزاعا قاجەتتى دارۋمەندەردى بەرمەيدى. سوندىقتان ءجيى قارنىڭىز اشىپ، مازاڭىز قاشىپ، السىزدىك ورناپ، سوڭىندا قالاي كالورياسى كوپ تاماقتى جەپ وتىرعانىڭىزدى بايقاماي دا قالاسىز.

سۋ

ارتىق سالماقتان كۇرەس جولىندا سان ءتۇرلى ديەتانى ۇستاپ، تالاي مارتە تاتتىدەن باس تارتىپ، نە ءبىر ءادىس- ءتاسىلدى جاساعان شىعارسىز. كۇنىنە ەكى ليتر سۋ ءىشىپ، تاماقتان تىيىپ ءمازسىز. ءبىراق، ءالى ءتىپتى، 100 گرام دا سالماق تاستامادىڭىز با؟!

ۇيتكەنى، ءسىز باستى شارتتى ەسكەرمەدىڭىز. سۋدى ءىشۋدىڭ وزىندىك ەرەكشەلىكتەرى مەن تالاپتارى بار. ءسىز سۋدىڭ ەستە ساقتاۋ قابىلەتى تۋرالى ەستىدىڭىز بە؟! بىلمەسەڭىز، مۇقيات وقىپ، تاجىربيەدە قولدانۋعا كەڭەس بەرەمىز.

 

ءيا، كۇندەلىكتى ومىردە ءىشىپ جۇرگەن سۋدىڭ دا ەستە ساقتاۋ قابىلەتى بار. مىسالى، ءسىز جاقىندارىڭىزعا وكپەلىسىز. اشۋلى وتىرىپ ءبىر كەسە سۋ ءىشتىڭىز. ىشىڭىزدەگى وكپە-كەكتى كادىمگى اۋىزسۋدىڭ ءوزى ساقتاپ قالدى. وسىلايشا ىشكەن سۋىڭىز اعزا تاراپ، قىزمەت اتقارمادى. دەنەڭىزدىڭ ءبىر بۇرىشىنا جينالىپ، مايعا اينالدى. ال، ەندى كەرىسىنشە، ءسىز ءبىر كەسە سۋدى وتىرىپ، اسىقپاي، جاقسى ويلاردى ويلاپ ىشسەڭىز تەز تارايدى. اعزانىڭ بارلىق مۇشەلەرىنىڭ قىزمەتىن قالىپقا كەلتىرەدى. وسىلايشا، دەنەگە جينالعان مايلارعا دا كۇش سالۋ ارقىلى ىدىراتادى. كوردىڭىز بە، ارىقتاۋ ءۇشىن سۋدىڭ ەمەس، وي پەن نيەتتىڭ ماڭىزى زور. سوندىقتان، كۇنىنە ءجيى-ءجيى سۋ ءىشىڭىز. ءبىراق، سۋدى وتىرىپ ىشۋدى ۇمىتپاڭىز. جانە تاماقتان 20 مينۋت ەرتە جانە تاماقتان سوڭ 20 مينۋتتان سوڭ ىشۋگە تىرىسىڭىز.

ءسۇت قوسىلعان قويۋ قازاقي شايدى ۇمىتىڭىز. بۇل تولىقتىققا عانا ەمەس، قان قىسىمىنىڭ رەتسىز، جۇرەك قاعىسىنىڭ ءالسىز بولۋىنا اسەر ەتپەك. ءيا، سىزگە ىستىق پالاۋدى جەپ، ارتىنشا ىستىق شايدى ۇرتاعان ۇنايتىن شىعار. ءبىراق، اسقازانعا تۇسكەن اس ىستىق سۇيىقتىقتىڭ كەسىرىنەن نىعىزدالادى. ناتيجەسىندە، اسقورىتۋ مۇشەسى ءوز قىزمەتىن تولىق اتقارا المايدى. سول سەبەپتى دە، سۇيىقتىقتى: شاي، سۋ، سۋسىنداردى تاماقپەن ارالاستىرماڭىز. كەرىسىنشە، تولىق تاماقتانىپ بولعان سوڭ 20 مينۋت سەرۋەن قۇرىپ، بوي جازىڭىز. سودان كەيىن عانا سۇيىقتىققا كەزەك بەرىڭىز.

جەمىس-جيدەك، كوكىنىستەر

دارۋمەنگە باي، پايدالى ميكروەلەمەنتتەرگە تولى، اسقورىتۋ جۇيەلەرىن رەتتەۋگە قابىلەتتى بۇل ونىمدەردى ءجيى قولدانعان ابزال. اسىرەسە، تۇسكى جانە كەشكى اسقا ءبىر ساعات ۋاقىت قالعان كەزدە جەمىس-جيدەك جەۋ پايدالى. سونداي-اق، جەمىس-جيدەكتەردى باسقا تاعامدارمەن مۇلدەم ارالاستىرماڭىز. الايدا، كوكىنىستەردىڭ اراسىندا كارتوپتان باس تارتىڭىز. مۇمكىندىگىنشە اپتاسىنا بىر رەت قانا كارتوپ كوكىنىسىن قولدانۋعا تىرىسىڭىز.

ەت – ەتكە، سورپا – بەتكە

ءبىراق، بۇل ماقالدىڭ دۇرىس تاماقتانۋعا اسا قاتىسى جوق. سەبەبى، قازاقتىڭ بەشبارماعى ءسوزسىز سالماق قوسىپ بەرەدى. الايدا، ادام اعزاسىنا ەتتە عانا بولاتىن دارۋمەندەر وتە قاجەت. سوندىقتان، دۇرىس تاماقتانۋ بارىسىندا ءجيى تاۋىق ەتى مەن مايلى ەمەس قويدىڭ ەتىن قولدانۋعا كەڭەس بەرەمىز.

بالىق پەن تەڭىز ونىمدەرى اقۋىزعا تولى، B دارۋمەنىمەن تولىق قامتىلعان ەڭ پايدالى تاعامداردىڭ ءبىرى.

ال، كەشكى استان سوڭ كوك شاي ىشۋدى ۇمىتپاڭىز. بۇل ىشەكتەردى تازالاپ، اسقورىتۋ جۇيەسىن رەتتەۋگە كومەكتەسەدى.

نان

ناندى مۇلدەم اس مازىرىنەن الىپ تاستاعان ابزال. ورنىنا كەپتىرىلگەن نەمەسە قاقتالعان ناندى قولدانۋعا بولادى. جانە تاڭعى اس كەزىندە ءبىر تىلىم قارا نان كەشىرىمدى.

تاعى ءبىر ەسكەرتۋ: كۇرىشپەن قوشتاسىڭىز، گرەچكامەن دوستاسىڭىز. ءدال سول گرەچكا ءسىزدىڭ گەموگلابيندى كوتەرىپ، سەرگەك جۇرۋگە سەبەپشى ەكەن.

تۇز بەن قانتتى ۇمىتىڭىز

اس دايىنداۋدا تۇزدى، ءشاي ىشۋدە قانتتى مۇلدەم قولدانباڭىز. تۇزسىز تاماقتىڭ ءدامى جوق دەپ ويلاۋ اقىماقتىق. ارينە، العاشقى كەزدە اڭسايتىنىڭىز انىق. ءبىراق، نە بارى 14 كۇننىڭ ىشىندە تۇزدىڭ ءدامىن ۇمىتاسىز. ال، تۇز بەن قانتتان باس تارتۋ تەك ارتىق سالماقتان ارىلۋعا ەمەس، قان اينالىمىنىڭ دۇرىس جۇمىس جاساۋىنا دا كومەكتەسپەك.

سونىمەن، كۇن تارتىبى بويىنشا دۇرىس تاماقتانۋدىڭ ءبىر نۇسقاسىن نازارلارىڭىزعا ۇسىنامىز.

تاڭعى اس: سۋعا دايىندالعان سۇلى جارماسى، ءبىر دانا الما، ءبىر ستاكان ءسۇت قوسىلعان كوفە نەمەسە ءشاي؛

ەكىنشى تاڭعى اس: ءبىر ستاكان ايران، ەكى دانا شابدالى نەمەسە باسقا دا جەمىس؛

تۇسكى اس: بالىق، كوكىنىستەن دايىندالعان سالات، سورپا بولماسا قانداي دا ءبىر سۇيىق تاعام؛

ەكىنشى تۇسكى اس: ۇگىتىلگەن ءسابىز پەن قىزاناق؛

كەشكى اس: بۇقتىرىلعان تاۋىق ەتى مەن كوكىنىستەن جاسالعان سالات:

بۇل تەك مىسال عانا. ال، بەس مەزگىلدىڭ تاماعىن قالاي رەتتەسەڭىز دە ءوز ەركىڭىز. باستىسى، كۇنىنە 800 گرام. اسىرىپ جىبەرۋدەن اباي بولىڭىز. جانە كەشكى اسىڭىزدى ۇيقىدان ءۇش-ءتورت ساعات ەرتە جەۋگە تىرىسىڭىز.

قاينار: كەرۋەن تورابى | رەداكتور: ايگەرىم | كورىلىم : 2222 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز