بالاعا ەرتە جاستان اقشا جيناۋدى ۇيرەتۋ ادىستەرى - كەرۋەن تورابى

بالاعا ەرتە جاستان اقشا جيناۋدى ۇيرەتۋ ادىستەرى

اتا-انا بالاسى دۇنيەگە كەلگەن سوڭ، ونىڭ بۇكىل ءىس-ارەكەتىنە جاۋاپتى. قارجىلىق ساۋاتتىلىقتىڭ ءوزى دە وسى وتباسىنان باستاۋ الادى. بۇگىندە كوپتەگەن اتا-انانىڭ بالا تاربيەسىندەگى وسىنداي كىشكەنتاي دۇنيەلەرگە كوڭىل بولە بەرمەيتىنى انىق. ال بالاڭىز ەسەيگەندە اقشانى وڭدى-سولدى شاشپاۋى ءۇشىن، اقشا جيناۋ مەن وعان دۇرىس قارىم-قاتىناس جاساۋدى ەرتە جاستان باستاپ ۇيرەتكەنىڭىز ءجون.

1. وتباسىلىق بيۋدجەتىڭىزدى بالاڭىزدان جاسىرماڭىز

بالاعا اقشا تۋرالى 3-4 جاستان باستاپ ايتا باستاعان دۇرىس. الايدا ونى بالانىڭ ءوز تىلىندە تۇسىندىرۋ قاجەت. ماسەلەن، شىعىندارىڭىزدى ءارءتۇرلى تۇستەرگە بولىڭىز. كوك – كوممۋنالدى تولەمدەرگە، سارى – ازىق-تۇلىككە، جاسىل – ويىنشىققا دەگەن سەكىلدى. بالا دۇكەنگە بارعاندا جاڭا ويىنشىق الىپ بەرۋىن سۇراسا، اقشا تەك سارى قوراپتا قالعانىن، ال جاسىل قوراپتا كەلەسى ايدا عانا اقشا بولاتىنىن وڭاي تۇسىندىرە الاسىز. سونىمەن قاتار بالاعا جاسىل قوراپتاعى اقشاعا تيىسپەي، ۇستىنە تاعى دا اقشا قوسىپ جينايتىن بولسا، ۇلكەن جانە كوپ ويىنشىق ساتىپ الا الاتىنىن تۇسىندىرىڭىز.

2. بالاعا قالاعانىن بىردەن الىپ بەرمەڭىز

بۇل بالاعا ەشتەڭە الىپ بەرمەڭىز دەگەن ءسوز ەمەس. بالاڭىز وزىنە قاتتى ۇناعان زاتىن الىپ بەرۋىن وتىنسە، قالاعانىن الىپ بەرۋدەن باس تارتپاڭىز. تەك الدىمەن بالاڭىزدان العىسى كەلگەن دۇنيەلەرىن تىزىمگە ەنگىزۋىن سۇراڭىز. قالاعان زاتىنىڭ سۋرەتىن سالىپ نەمەسە جازىپ، توڭازىتقىشتىڭ سىرتىنا ءىلىپ قويىڭىزدار. اي سوڭىندا تىزىمگە قاراپ ءبىر ويىنشىقتى تاڭداتساڭىز بولادى. ياعني بالاڭىز ساۋدانى ويلانىپ جاساۋعا ۇيرەنەدى جانە جارنامانىڭ ارباۋىنا تۇسپەۋگە بەيىمدەلەدى.

3. بالاڭىزدىڭ قالتاسىندا اقشا سالىپ قويىڭىز

بالاڭىزدىڭ قالتاسىندا 10 يۋان بار دەلىك. ال بۇل اقشاعا كىشكەنتاي ءبىر ويىنشىق ساتىپ الا الاتىنىن ايتىڭىز. ەگەر تاعى ءسال كۇتسە ۇستىنە اقشا قوسىپ، ودان ۇلكەنىرەك ويىنشىق ساتىپ الۋىنا كومەكتەسەتىنىڭىزدى ءتۇسىندىرىڭىز. سوندا بالاڭىز قالتاسىنداعى اقشاسىن تەككە قۇرتپاي، ساتىپ العىسى كەلەتىن نارسەسىن الدىن الا جوسپارلاۋدى ۇيرەنەدى.

4. قاجەت زاتتاردى ماڭىزدىلىعىنا قاراي ءبولىڭىز

بالالار بۇگىن ءبىر نارسەنى قالاسا، ەرتەسى كۇنى باسقا ءبىر زاتتى العىسى كەلۋى مۇمكىن. سول سەبەپتى ءوزى قالاعان زاتتارىن ماڭىزدىلىعىنا قاراي بىرنەشە بولىككە ءبولىڭىز. بالاڭىزدان قاي زاتتى قازىر العىسى كەلەدى جانە ماڭىزى قانداي ەكەنىن، قايسىسىن كەيىنىرەك الۋعا بولاتىنىن سۇراڭىز. ەگەر دە الاتىن زاتى تىم قىمبات بولسا، وندا ۇساق اقشا جينايتىن ءۇي كاسساسىنا (كوپيلكاعا) بىرىگىپ اقشا جيناۋدى ۇسىنىڭىز. ناتيجەسىندە بالاڭىز جوسپارلاۋ مەن بولاشاق ساۋداسىن ويلاستىراتىن بولادى.

5. جاقسى وقىعانى ءۇشىن اقشا تولەمەڭىز

بالاڭىزعا «جاقسى باعا الساڭ 10 يۋان بەرەمىن»، — دەپ ەشقاشان ايتپاڭىز. مۇنداي ءتاسىل وقۋدى اقشا تابۋ كوزىنە اينالدىرىپ جىبەرۋى مۇمكىن. ياعني ول ءوزى ءۇشىن ەمەس تەك باعا مەن اقشا ءۇشىن عانا وقيتىن بولادى. ونىڭ ورنىنا وقۋ جىلىنىڭ سوڭىندا نەمەسە جارىستان جۇلدە العاندا «سىي اقى نەمەسە سيلىق» بەرسەڭىز بولادى.

قاينار: يىنتەرنەتتەن | رەداكتور: اراي | كورىلىم : 910 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز