كۇيزەلىستەگى ادامدى قالاي قولداۋعا بولادى؟ - كەرۋەن تورابى

كۇيزەلىستەگى ادامدى قالاي قولداۋعا بولادى؟

كۇيزەلىس– ەڭ ءجيى تاراعان پسيحيكالىق اۋىتقۋ: ددۇ ستاتيستيكاسى بويىنشا قازىر الەمدە 250 ميلليوننان استام ادام كۇيزەلىسكە شالدىققان نەمەسە باستاپقى بەلگىلەرى بايقالادى. كۇيزەلىس ءسوزى كوبىنە ناشار كوڭىل-كۇيدىڭ سينونيمى رەتىندە قولدانىلادى، دەگەنمەن ول بىرنەشە جاعىمسىز ەموتسيا مەن سەزىمدەردىڭ جيىنتىعى.

مازاسىزدىق، السىزدىك، ۇيقىشىلدىق، ەشنارسەگە قىزىعۋشىلىق بولماۋى جانە سالعىرتتىق. وسىنىڭ ءبارى كۇيزەلىس بەلگىلەرى. ەگەر مۇنداي بەلگىلەردى جاقىن جاندارىڭىزدان بايقاساڭىز، وعان كۇيزەلىستەن شىعۋعا كومەكتەسىڭىز.

1. كۇيزەلىس تۋرالى كوبىرەك زەرتتەڭىز:

ماماندار الدىمەن كۇيزەلىس تۋرالى كوبىرەك اقپارات الۋعا شاقىرادى: ونىڭ بەلگىلەرى قانداي، ول قانداي جاعدايدا تۋىندايدى جانە قالاي جەڭۋگە بولادى. ول ءۇشىن سەنىمدى اقپارات كوزىن پايدالانىڭىز. دۇنيەجۇزىلىك دەنساۋلىق ساقتاۋ ۇيىمىنىڭ ماقالالارى، ارنايى مامانداردىڭ پىكىرى، دالەلدى مەديتسينالىق اقپاراتقا شولۋ جاساڭىز. ويدان شىعارىلعان اقپاراتتان الشاق بولىڭىز جانە تەك سەنىمدى دەرەككوزدى قولدانىڭىز. مىسالى كۇيزەلىس — پسيحيكالىق اۋىتقۋ، كۇيزەلىستە جۇرگەن ادام ءارقاشان كوڭىلسىز بولماۋى مۇمكىن جانە ول باسقا ءبىر اۋرۋدىڭ بەلگىسى بولۋى مۇمكىن.

دەپرەسسيا — ادام ومىرىندە كەزدەسەتىن وڭاي سىناق ەمەس، ءبىراق ەمدەلەدى:  پسيحوتەراپيالىق ءادىس نە دارى-دارمەك ارقىلى ەمدەۋگە بولادى. باسقا اۋرۋ تۇرلەرى سەكىلدى ءوزىن ءوزى ەمدەۋ ءىستى ۋشىقتىرىپ جىبەرۋى مۇمكىن. ەگەر جاقىنىڭىزدان كۇيزەلىس بەلگىلەرىن بايقاساڭىز، كوز جەتكىزۋ ءۇشىن وعان زانگ تەستىن جاساۋدى ۇسىنىپ كورىڭىز.

ەگەر ادام ءوزىنىڭ كۇيزەلىستە جۇرگەنىن جانە بيپوليارلى اۋىتقۋ بەلگىلەرى بارىن انىق بىلسە، وعان كوز جۇمىپ قاراۋعا بولمايدى. مۇنداي كەزدە «ۋايىمداما»، «ءبارى وتەدى دە، كەتەدى»، «كۇلىمدە» دەگەن سوزدەر مۇلدە كومەكتەسپەيدى.

2. قانداي كومەك كەرەگىن اشىق سۇراڭىز:

ايدان انىق نارسە بولسا دا، بۇل سۇراقتى قويۋعا تۋرا كەلەدى. ويتكەنى كوبىنە وزگەگە كومەكتەسەم، قولدايمىن دەگەن ويمەن ءبىز وزىمىزگە ىڭعايلى نارسەنى عانا جاسايمىز. ءبىراق وزىمىزگە كومەگى تيەتىن نارسە، وزگەگە دە پايدالى بولۋى مۇمكىن ەمەس. ەمدەلۋدىڭ جولىن تابۋ ءۇشىن وعان نە كەرەگىن ۇققانىڭىز ءجون.

كومەك ءارتۇرلى بولۋى مۇمكىن: بىرەۋى ءدامدى اس دايىنداپ بەرۋدى سۇرايدى، بىرەۋى دالادا سەرۋەندەپ قايتايىق دەيدى، ەندى ءبىرى جاي عانا تىڭداعانىڭىزدى قالايدى. الدىن-الا ءوز كۇشىڭىزدى ءبىلىپ الىڭىز: ەگەر كومەكتەسۋدى ويلاماي، تەك سىپايىلىق ءۇشىن عانا ۇسىنساڭىز ونىڭ ءبارى تەككە كەتەدى. ەگەر جاقىن ادامىڭىز جالعىز بولۋدى سۇراسا جانە كومەك كەرەك ەمەس دەسە ءوتىنىشىن جەردە قالدىرماڭىز. ونى قيناۋدىڭ قاجەتى شامالى، ءبارىبىر ناتيجەسىز بولادى.

3. قولىڭىزدان كەلگەنشە جانىنان تابىلىڭىز:

كۇيزەلىس كەزىندە جاقىن جاننىڭ قاسىنان تابىلۋى وتە ماڭىزدى. مۇمكىندىگىڭىزگە قاراي ونىڭ ءوتىنىشىن جەردە قالدىرماۋعا تىرىسىڭىز: سەرۋەندەپ قايتۋ، بىرگە شاي ءىشۋ، تەلەفونمەن سويلەسۋ. كۇيزەلىستەگى اداممەن اڭگىمەلەسۋ، ارالاسۋ قيىن  ءارى قۋاتتى كەرەك ەتەتىنىن ۇمىتپاڭىز.

مۇندايدا باتىس پسيحولوگتارى كوڭىل-كۇي جۋرنالىن پايدالانۋدى ۇسىنادى. بۇل ادامنىڭ كوڭىل-كۇيىن باقىلاپ، وعان اسەر ەتكەن نارسەلەردى ساراپتاۋعا كومەكتەسەدى. ونى قاعاز جۇزىندە دە نەمەسە موبيلدى قوسىمشا تۇرىندە دە پايدالانۋعا بولادى. Apple Store جانەPlay Store جەلىلەرىنەن «كوڭىل-كۇيى ترەكەرى» (نەمەسە «ترەكەر ناستروەنيا»، «mood log») دەپ ىزدەپ تابۋعا بولادى.

4. جاقىنىڭىزدى ورتاعا قوسۋعا تىرىسىڭىز:

كۇيزەلىستە جۇرگەن ادام بارىنەن وڭاشالانا باستايدى: ولاردىڭ كەرەۋەتتەن تۇرۋعا كۇشى بولمايدى، ءبىر جاققا شىعۋ ولار ءۇشىن ازاپ. كەزدەسىپ، سويلەسۋگە شاقىرعانىڭىزبەن، ءاردايىم باس تارتادى. ۋاقىت وتە كەلە، ول ادامعا نازار اۋدارۋ قيىنداي تۇسەدى. كۇيزەلىستە جۇرگەن ادام ءۇشىن ونى ۇمىتپاۋ، ودان باس تارتپاۋ سەزىمى ماڭىزدى ءرول اتقارادى. ءوزىن كەرەكسىز سەزىنۋ ءبارىن ۋشىقتىرىپ جىبەرەدى. سوندىقتان، ونىڭ باس تارتاتىنىن بىلسەڭىز دە، ءبىر رەت ەسكەرتىپ، شاقىرعانىڭىز دۇرىس.

كۇيزەلىستەگى اداممەن جۇمىس كەزىندە ءوزى ەموتسياڭىزدى باسقارۋ دا ماڭىزدى. اشۋلاڭباڭىز جانە كوڭىلىڭىز تۇسپەسىن. ويتكەنى، ونىڭ سىزگە دەگەن سۋىق قارىم-قاتىناسىنىڭ سىزگە قاتىسى بولماۋى ابدەن مۇمكىن.

5. بايقالعان وزگەرىستەردىڭ ءبارىن ەسكەرىڭىز:

كۇيزەلىستى ەمدەۋدەگى ماڭىزدى نارسە العاشقى قادام بولۋى مۇمكىن: دارىگەرگە كورىنۋ نەمەسە تەراپياعا جازىلۋ. بۇل ۋاقىتتا ءسىز ونى ەمحاناعا بىرگە بارىپ قولداۋ بىلدىرە الاسىز. جاقىنىڭىزعا ۋايىمىن باسۋ ءۇشىن بارعانعا دەيىن دە، ودان كەيىن دە حابارلاما جازىڭىز. سول ارەكەتىڭىز ارقىلى ونىڭ ەم العانىن، ايىققانىن جانە قاتارعا قوسىلعانىن تىلەيتىنىڭىزدى بىلدىرەسىز.   كۇيزەلىستەن ەمدەلۋى كەزىندە وڭالعانى بىردەن بايقالمايدى. سوندىقتان ماماندار ەم كەزىندە تەك اقشا، دارى-دارمەك، ۋاقىت قورى عانا ەمەس، ادامنىڭ ءتوزىمى دە كەرەك ەكەنىن ايتادى.

قاينار: قازاقىستان تورابى | رەداكتور: سارماي | كورىلىم : 235 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز