سۇحبات الۋدىڭ تاكتيكالارى: «اعاشتى» دا سويلەتۋگە بولادى - كەرۋەن تورابى

سۇحبات الۋدىڭ تاكتيكالارى: «اعاشتى» دا سويلەتۋگە بولادى

سۇحبات تەك جۋرناليستيكا ماماندارى ءۇشىن عانا قاجەت ەمەس. كەز كەلگەن اداممەن قارىم-قاتىناس قۇرۋ بارىمىزگە قاجەت قاسيەت. قىزىقتى اڭگىمە-دۇكەن ءسىز ءۇشىن تابىستى بولارى ءسوزسىز. ءاربىر ادام اقپارات تاسىمالداۋشىسى بولىپ تابىلادى. قىزىقتى ديسكۋسسيا مەن سۇراق-جاۋاپ بارلىق سۇراعىڭىزعا جاۋاپ الۋعا سەپتىگىن تيگىزەدى. بۇل ءۇشىن بىرنەشە ءادىس پەن قۇپيانى ءبىلۋىڭىز كەرەك.

«دۇرىس ادامدى» تاڭداڭىز

ەڭ ءبىرىنشى، سۇحبات تابىستى بولۋى ءۇشىن «دۇرىس ادامدى» تاڭداۋىڭىز قاجەت. ايتارى كوپ، اقپاراتتىڭ كوزى بولىپ تابىلاتىن تۇلعانى تاڭداپ الىڭىز. كوپشىلىگى ەگەر ادام تانىمال بولسا نەمەسە تەلەديدار مەن گازەت بەتتەرىنەن كوپ كورىنسە، وندا سۇحبات قىزىقتى وتەدى دەپ قاتەلەسەدى. كوپ سۇحباتتاساتىن ادامنىڭ وزىنەن ينتەرۆيۋ ارقىلى جاڭا دۇنيەنى الۋ قيىن. ەگەر ەكسكليۋزيۆ شىقپاسا، ءبارى جاقسى ءوتتى دەپ ەسەپتەۋدىڭ قاجەتى جوق.

دايىندىقسىز بولمايدى

ەكىنشى، ۇلكەن دايىندىق كەرەك. كەيىپكەردىڭ سوڭعى جىلدارى قاي تاقىرىپتاردى قوزعاپ، نە تۋرالى ايتىپ جۇرگەنىن ءبىلىپ الىڭىز. كوپ اداممەن تىلدەسىپ، سول ادام جايلى اقپارات جيناڭىز. سەبەبى بارلىق جاعدايعا دايىن بولۋىڭىز قاجەت. ءسىز كەيىپكەرىڭىزبەن بولعان اراداعى اڭگىمەنى ەستىگەن نەمەسە كورگەن ادام سول ينتەرۆيۋدانوزىنە قاجەتتى اقپارات الۋى كەرەك. ەڭبەك دالاعا كەتپەيدى، ءسىزدىڭ دايىندىعىڭىز ءوز جەمىسىن مىندەتتى تۇردە بەرەدى.

سۇراقتار رەتتەۋ ستراتەگياسى

ءۇشىنشى، سۇراقتار رەتىن رەتتەستىرىپ الىڭىز. اڭگىمە بۇل– پسيحولوگيا. كەيىپكەر سۇحبات باسىنان باستاپ جاسىرىنىپ قالۋى مۇمكىن. بۇدان ءسىز ەش پايدا كورمەيسىز. سول ءۇشىن سۇراقتاردى رەتتەپ الىڭىز. مىسالى، باستاپقى ۋاقىتتا كەيىپكەرگە جىلى سويلەپ، ونىڭ ناعىز بەينەسىن اشاتىن سۇراقتاردى قويىڭىز. الەمدى قۇتقارۋ نەمەسە وزگە پروبلەمالاردى ايتىپ، ونى ءوزىنىڭ ويىنداعى باتىرعا اينالدىرىڭىز. سودان كەيىن بىردەن شابۋىلعا شىعۋعا بولادى. وزىڭىزبەن بىرگە الىپ كەلگەن «قارۋلاردى» قولدانىپ، وتكىر سۇراقتاردى قويىڭىز. ەسىڭىزدە بولسىن، «قارۋىڭىزدى» ەش ۋاقىتتا بىردەن قولدانىسقا سالماڭىز. سونىمەن قاتار ءوز قاقپاندارىڭىزدى دايىنداڭىز. كەيىپكەرىڭىز بۇل قاپقانعا تۇسكەن سوڭ شىعا الماي، ءسىزدىڭ سۇراقتارىڭىزعا ءوزى-اق جاۋاپ بەرەدى.

بىرەۋدىڭ اتاعىنان قايمىقپاڭىز

ءتورتىنشى، ەشنارسەدەن قورىقپاڭىز. وتە قاراپايىم ەرەجە. ءبىراق ۇلكەن ماڭىزعا يە. بارلىق ادام بىردەي. ونىڭ قىزمەتى، جەتىستىگى مەن ايلىق تابىسى ءسىزدىڭ جانە كەيىپكەرىڭىزدىڭ اراسىندا ەشقانداي ءبولىنىستى تۋدىرمايدى. قويانداي قورقىپ، كەيبىر سۇراقتاردى قويماي كەتۋگە بولمايدى. جاس ەرەكشەلىگىن سيلاڭىز. دورەكىلىك ەمەس، سىپايىلىق تانىتىڭىز. سىزدەن تالاپ ەتىلەتىنى وسى عانا.

شەشەنسىمەڭىز

بەسىنشى، سۇحبات كەزىندە ءوزىڭىزدى الدىڭعى شەپكە شىعارۋدىڭ قاجەتى جوق. ۇزاق سۇراق قويماڭىز. بۇل سۇراققا قاتىستى ءوز ويىڭىزدى ءبىلدىرىپ، ۋاقىتتى سوزۋدىڭ قاجەتى جوق. سەبەبى ءسىزدىڭ پىكىرىڭىز ارتىقتاۋ.  سۇحبات الۋشىنى داياشىمەن سالىستىرۋعا بولادى. داياشىنىڭ قالاي تاپسىرىس قابىلداعانىن، ونى قالاي تەز داستارحانعا اكەلگەنىن ءبىز بايقاماي قالامىز. سۇحبات الۋشى دا سونداي بولۋى قاجەت. باستى نازار كەيىپكەردە بولۋى شارت.

كەيىپكەرمەن شايقاسپاڭىز

التىنشىدان، سۇحباتتىڭ ءساتسىز شىعۋىنان قورىقپاڭىز. باستىسى– قىزىقتى ءونىم جاساپ، كورەرمەن مەن تىڭدارمان، وقىرماڭعا تىڭ اقپاراتقا تولى دۇنيە ۇسىنۋ. ءسىز سۇحبات بارىسىندا كەيىپكەرىڭىزدەن جەڭىلۋىڭىز مۇمكىن، ءبىراق ءسىز انىقتاعان اقپارات التىنمەن تەڭ.

اقپارات ەستە قالۋى كەرەك

جەتىنشىدەن، ەستە قالارلىق سۇحبات شىعارۋعا تىرىسىڭىز. مىسالى، كەيبىر سۇحباتتاردى كورگەننەن كەيىن ەشتەڭە ەستە قالمايدى. جاقسى سۇحبات– وقىرمان نە كورەرمەننىڭ ەسىندە قالعان سۇحبات.

بۇرمالاماڭىز

سەگىزىنشى، سۇحبات بارىسىن بۇرمالاماڭىز. اڭگىمە نەمەسە سۇحبات بارىسىندا باعىت ءسىزدىڭ باسقارۋىڭىزدان شىعىپ كەتۋى مۇمكىن. جاي عانا سۇراقتار ارقىلى بۇرىنعى ارناعا بۇرىڭىز.

ءبارىن رەداكتورلاماڭىز

توعىزىنشى، سۇحباتتى وزگەرتپەڭىز. كەيبىر جۋرناليستەر ءوز كەيىپكەرىنىڭ سوزدەرىن وزگەرتىپ تاستايدى. كەيىپكەرىڭىز اڭگىمە بارىسىندا ينۆەرسيا مەن جارگون سوزدەردى قولدانسا، ونى سول قالپىندا قالدىرىڭىز. ويتكەنى وقىرمان سۇحباتتى وقۋ بارىسىندا سول اداممەن ءوزى تىلدەسكەندەي اسەردە بولۋى كەرەك.

سوڭىندا ءبىر تەكسەرىڭىز

ونىنشى، سۇحبات بارىسىن تەكسەرۋدى ۇمىتپاڭىز. سۇحبات نەمەسە اڭگىمە بارىسىنداعى اقپاراتتاردى تەكسەرىڭىز. مۇنىڭ ۇلكەن ماڭىزى بار. گازەت بەتىندەگى سۇحباتتى جاريالاۋ كەزىندە بىرنەشە وزگەرىستەر ەنگىزىلۋى مۇمكىن. سۇحباتىڭىزدىڭ ەڭ ماڭىزدى تۇسى مەن جەمىستى بولىكتەرى سول قالپىندا ساقتالۋى ءۇشىن ءبىر رەت تەكسەرىپ ءوتۋ ارتىقشىلىق ەتپەيدى.

ماتەريال يۋري ءدۋدتىڭ ««اعاشتى» قالاي سويلەتۋ كەرەك» شەبەرلىك ساعاتى بارىسىندا ستۋدەنتتەرمەن بولىسكەن اقپارات نەگىزىندە دايىندالدى.

قاينار: يىنتەرنەتتەن | رەداكتور: سارماي | كورىلىم : 378 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز