بوتامويىن مەن بوزداۋىق – بايىرعى مۋزىكالىق اسپاپ - كەرۋەن تورابى

بوتامويىن مەن بوزداۋىق – بايىرعى مۋزىكالىق اسپاپ

ءتۇبى جوق تاريحتىڭ تەرەڭ قاتپارلارىندا قالىپ قويعان بوتا­مويىن مەن بوزداۋىق جايلى ەستىپ پە ەدىڭىز؟ قازاقتا وسىنداي مۋزىكالىق اسپاپتار بولعانىن قۇلاعىڭىز شالدى ما؟

باركول قازاق اۆتونوميالى اۋدانىنىڭ مۇراجايىندا بوتامويىن مەن بوزداۋىق دەپ اتالاتىن بايىرعى مۋزىكالىق اسپاپتارىمىز قويىلعان. بۇل ەكەۋى دە قوبىز تەكتەس ىسپالى اسپاپ.

بوتامويىن مۋزىكالىق اسپابىنىڭ ەرەكشەلىگى – بوتانىڭ مويىن تەرىسىمەن قاپتالادى، ءپىشىنى دە بوتانىڭ بەينەسىندە جاسالادى. بوزداۋىق مۋزىكالىق اسپابىنىڭ ەرەكشەلىگى – مۇڭعۇل ۇلتىنىڭ «بوزان» دەپ اتالاتىن ىسپالى مۋزىكالىق اسپابىنا قاتتى ۇقسايدى، تەك قۇلاقتارىندا وزگەشەلىك بار. مۇڭعۇل ۇلتىنىڭ «بوزان» اسپابى قۇلاعىنىڭ باسى ات بەينەسىندە ويىلاتىندىقتان، قىتايداعى قازاقتار ونى «اتباس قوبىز» دەپ تە ايتادى. مۇڭعۇل حالقى قولداناتىن بوزان اسپابى بولسىن، بىزدەگى اتالعان بوزداۋىق اسپابى بولسىن، ءبارى دە «بوزداۋ، بوزداعان ءۇن» دەگەن ماعىنا بەرىپ، ىسپالى اسپاپ ەكەنىن دە، ىسپالى اسپاپتارعا ساي زارلى ءۇنى بار ەكەنىن دە بىردەن اڭعارتادى. اتاۋدىڭ توركىنى كونە تۇركىنىڭ كەڭ تارالعان «بوزداۋ» سوزىنەن شىعىپ وتىر.

ءبىز وسى بايىرعى ەكى مۋزىكالىق ىسپالى اسپاپ جونىندە باركول قازاق اۆتونوميالى اۋدانى مۇراجايىنىڭ قىزمەتكەرى مانات مىرزاعا حابارلاسىپ كورگەنىمىزدە، ول كىسى «بۇل مۋزىكالىق اسپاپتارىمىزدىڭ ءالى دە مۇراجايدا جاقسى كۇتىممەن ساقتاۋلى ەكەنىن، ۇلتىمىزدىڭ ماقتانىشى بولعانىن، تالاي ۇلتىن سۇيگەن كورەرمەننىڭ كوز قىزىعىنا اينالعانىن» جەتكىزدى جانە ءبىز اتاپ كورسەتكەن ەرەكشەلىكتەرىن اعىنان جارىلىپ اڭگىمەلەپ بەردى.

مانات مىرزانىڭ ءجون سىلتەۋىمەن، وسى ەسكىلىكتى اسپاپتاردى جاڭارتىپ جاساپ، مۇراجايعا ءوز سانىمەن ەنگىزگەن ءنۇرادىل مىرزاعا حابارلاسۋىمىزدى ءوتىندى. ءبىز ءنۇرادىل مىرزاعا حابارلاسۋ ارقىلى، اسپاپتاردىڭ ەسكىلىكتى نۇسقاسىنىڭ تىم توزىپ كەتكەنىن ونى ساقتاۋعا مۇمكىن بولماي قالعانىن، سوندىقتان ءنۇرادىل مىرزانىڭ ءوزى بۇل ەكى اسپاپتى كونە نۇسقاسىنا قاراپ وتىرىپ، وڭدەپ، جاڭارتىپ جاساپ شىققانىن بىلدىك.

ازىرگە بۇل ەكى اسپاپتى قولداناتىندار جوق، كونە-كوز قولدانۋشىلار ومىردەن وزعان. الايدا مانات، ءنۇرادىل مىرزالاردىڭ ايتۋىنشا، بوزداۋىق اسپابىنىڭ ءوز دىبىسىن قالپىنا كەلتىرىپ قولدانۋعا بولادى ەكەن. دەسەدە، بوتامويىن اسپابىنىڭ ءپىشىنى قاز-قالپىندا جاسالعانىمەن، ءوز اۋەنىن ساقتاي وتىرىپ جاساۋدا قيىندىقتار بولعاندىقتان، ول اسپاپتى ەسكى نۇسقاسىنداي ەتىپ قولدانۋ قيىنعا تۇسەدى ەكەن.

نە بولسا دا، كونەنىڭ كوزى بولعان ەكى اسپابىمىزدىڭ ءۇنىن بولماسا دا، سىرتىن ساقتاپ، وسى كۇنگە جەتكىزىپ وتىرعان باركول قازاق اۆتونوميالى اۋدانىنا العىسىمىز شەكسىز.

قاينار: يىنتەرنەتتەن | رەداكتور: سارماي | كورىلىم : 1003 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز