قىزىل بۇقا ياعىني Red Bull سۋسىننان سپورتقا دەيىن - كەرۋەن تورابى

قىزىل بۇقا ياعىني Red Bull سۋسىننان سپورتقا دەيىن

Red Bull– اۆستريادا وندىرىلەتىن ەنەرگەتيكالىق سۋسىن جانە الەمدەگى تانىمال تاۋارلاردىڭ ءبىرى. بۇدان بولەك كومپانيا ءتۇرلى سپورت جارىستارىن ۇيىمداستىرىپ، بىرنەشە سپورت كوماندالارىنا يەلىك ەتەدى. «Red Bull»- دىڭ مۇنداي جەتىستىككە جەتۋىنە نە كومەكتەستى؟

1970- جىل

چالەو ييۋۆيديا ەسىمدى كاسىپكەر تايلاندتا«T. C. Pharmaceuticals» فارماتسيەۆتيكالىق كومپانياسىنىڭ نەگىزىن سالدى. بۇدان كەيىن ول«Krating Daeng» (قىزىل بۇقا) دەپ اتالاتىن ەنەرگەتيكالىق سۋسىندى جاساپ شىقتى. ۋاقىت وتە بۇل سۋسىن حالىق اراسىندا كەڭ تارالىپ، تانىمالدىلىققا يە بولدى.

1982- جىل

«Red Bull GmbH» كومپانياسىنىڭ بولاشاق باسشىسى ديتريح ماتەشيتس تايلاندقا ىسساپارمەن كەلىپ، العاش رەت «قىزىل بۇقانىڭ» ءدامىن تاتادى. ەنەرگەتيكالىق سۋسىننىڭ ساتىلىم دەڭگەيى جاقسى ەكەنىن كورگەن ول سۋسىن ارقىلى جاقسى تابىس تابۋعا بولاتىنىن بايقايدى.

ديتريح كوپ ويلانباستان«Krating Daeng» سۋسىنىن ساتۋ قۇقىعى مەن جاساۋ قۇپياسىنا قول جەتكىزەدى. «Krating Daeng» تىڭ باستاپقى نۇسقاسى تايلاندتا ءالى كۇنگە دەيىن ساتىلادى.

العاشقى ساتىلىم

ديتريح ماتەشيتس پەن چالەو ييۋۆيديا بىرىگە وتىرىپ«Red Bull GmbH» كومپانياسىن قۇرادى. ەكەۋى دە بولاشاق كاسىپتەرىنە $500000 ينۆەستيتسيا قۇيدى. ال ونەركاسىپ باسشىسى ماتەشيتس بولدى.

كاسىپكەرلەر 1984-1987- جىلدار ارالىعىندا سۋسىننىڭ ءدامىن وزگەرتىپ، ەۋروپالىق ستاندارتقا كەلتىرۋگە تىرىستى. 1987- جىلى«Red Bull» دىڭ اۆستريادا تانىستىرىلىمى ءوتىپ، 1- ساۋىردە العاشقى بانكاسى ساتىلدى.

العاشقى كەدەرگىلەر

ماتەشيتستىڭ بۇل سالادا تاجىريبەسى بولماۋى، نارىقتاعى باسەكە«Red Bull» دىڭ بىرنەشە ميلليوندىق شىعىنعا ۇشىراۋىنا الىپ كەلدى. سۋسىن ساتىلىمعا شىعا سالىسىمەن«Coca Cola» مەن«Pepsi» سىندى الىپتاردىڭ كولەڭكەسىندە قالىپ قالدى. بۇل جاعدايدان كەيىن ديزاينەرلەر سۋسىننىڭ بانكاسىن وزگەرتىپ، كولەمىن ەكى ەسەگە كىشىرەيتەدى. وسىلايشا نارىقتاعى جاڭا تاۋار دۇكەننىڭ تەك سۋسىندار بولىمىندە عانا ەمەس، كەز كەلگەن بولىگىندە ساتىلدى.

ديتريح ماتەشيتس سۋسىننىڭ تۇراقتى تۇتىنۋشىلارى ستۋدەنتتەر ەكەنىن ءبىلىپ، جاستار اراسىندا كوپتەپ تاراتا باستادى. ءتىپتى كامپۋستا وتەتىن كەشتەرگە ءوزىنىڭ ءونىمىن تەگىن بەردى. باسشىنىڭ بۇل شەشىمى ءوز پايداسىن تيگىزدى: سۋسىن جىلدام قارقىنمەن ساتىلىپ، اۆستريادا تانىلا باستادى.

حالىقارالىق نارىققا شىعۋى

1992- جىلى «قىزىل بۇقا» ۆەنگريا، سلوۆەنيا ەلدەرىندە، 1994- جىلى گەرمانيا مەن ۇلىبريتانيادا ساتىلا باستادى. ال 1997- جىلى ا قش نارىعىنا اياق باسىپ، تارالۋ اۋماعىن كەڭەيتە ءتۇستى. ەنەرگەتيكالىق سۋسىننىڭ حالىق اراسىندا جىلدام تانىلۋىنا ماركەتولوگتار تاراتقان وسەك كومەگىن تيگىزدى.

العاشقى ءىرى سپورت شاراسى

ديتريح ماتەشيتس سپورت شارالارىنا دا ۇلكەن كوڭىل ءبولدى. 2003- جىلى العاش رەت«Red Bull Air Race» ۇيىمداستىرىلدى. ءبىراز ۋاقىت وتكەن سوڭ ماتەشيتس«Ford» كومپانياسىنىڭ فورمۋلا-1 جارىسىنا قاتىساتىن«Jaguar Racing» كومانداسىن ساتىپ الادى. كەيىن بۇل كوماندا اتاۋى«Red Bull Racing» بولىپ وزگەرتىلدى.

بۇگىنگى تاڭدا كومپانيا بىرنەشە ءىرى سپورت كوماندالارىنا يەلىك ەتەدى. ال الەم بويىنشا ۇيىمداستىراتىن سپورت شارالارىنا كاسىبي سپورتشىلار قاتىسىپ، سۋسىننىڭ ودان ءارى تانىلا تۇسۋىنە اسەر ەتۋدە.

قاينار: يىنتەرنەتتەن | رەداكتور: سارماي | كورىلىم : 238 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز