«التىن دوپ» العان فرانسيا فۋتبولشىلارى - كەرۋەن تورابى

«التىن دوپ» العان فرانسيا فۋتبولشىلارى

فرانسيا فۋتبول تالانتتارىنا باي ەل. جاسىل الاڭداعى جارقىن ويىنىمەن تالايدى تاڭداندىرعان ويىنشىلارى جەتىپ ارتىلادى. بۇگىن فرانسيادان شىققان «التىن دوپ» يەگەرلەرى جايلى ايتپاقپىز.

«التىن دوپ» – ءار فۋتبولشى ارمانىنداعى ماراپات. وعان مىقتىنىڭ مىقتىسى عانا قول جەتكىزە الادى. ماراپات 1956- جىلدان باستاپ بەرىلە باستادى. ۇيىمداستىرۋشى دا فرانسيانىڭ«France Football» سپورتتىق باسىلىمى.

مارتەبەلى ماراپاتقا يە بولعان فرانتسۋز فۋتبولشىلارى از ەمەس. گەرمانيا مەن يتاليادان (5 فۋتبولشى العان) كەيىنگى ورىندا. برازيليا جانە انگليامەن ربىر قاتاردا.

ەڭ العاش «التىن دوپ» العان فرانسيالىق فۋتبولشى – رايمون كوپا. ول 1958- جىلى «رەال مادريدتە» ويناپ جۇرگەندە بۇل اتاققا يە بولدى.

فۋتبولشى 1931- جىلى فرانسياعا پولشادان كەلگەن يمميگرانت وتباسىندا دۇنيەگە كەلگەن. الاڭداعى ءمانسابىن وڭ قاپتالداعى شابۋىلشى پوزيتسياسىندا باستاعان. كەيىننەن ورتالىق شابۋىلشى ورنىنا اۋىسقان.

1958- جىلى شۆەتسيادا وتكەن الەم چەمپيوناتىندا ۇزدىك ونەر كورسەتتى. فرانسيا قۇراماسى قولا جۇلدەگەر اتاندى. وسى جىلى «التىن دوپتى» ەنشىلەدى.

اياقتان العان جاراقاتى مەن سوعان جاساتقان وتا سالدارىنان 1967- جىلى فۋتبولشى ءمانسابىن اياقتادى.

رايمون كوپا 2017- جىلى 85 جاسىندا كوز جۇمدى. وسى جىلى تولىق جوندەۋدەن وتكەن «انجە» كومانداسى ستاديونىنا فۋتبولشى ەسىمى بەرىلدى.

رۇش بىردەي «التىن دوپ» العان جالعىز فرانسۋز، ول – ميشەل پلاتيني. 1983-1985- جىلدار ارالىعىندا وعان تەڭ كەلەر ەشكىم بولمادى. 1984- جىلى ۇلتتىق قۇراما ساپىندا ەۋروپا چەمپيونى اتاندى.

ميشەل پلاتيني 1955- جىلى فرانسيانىڭ سولتۇستىك-شىعىسىنداعى جەف دەگەن ەلدىمەكەندە دۇنيەگە كەلگەن. سپورتتاعى ءمانسابىن وسى ەلدىمەكەندەگى كوماندادا باستاعان. كەيىننەن «نانسي»، «سەنت-ەتەن» جانە «يۋۆەنتۋستە» دوپ تەپتى.

ءبىر رەت كۋۆەيت ۇلتتىق قۇراماسىندا دا ويناپ كورگەن. 1988- جىلى پلاتيني فۋتبولدان ازيا كۋبوگىنىڭ اشىلۋىنا قۇرمەتتى قوناق بولىپ بارادى. ال وندا كۋۆەيت ك س ر و قۇراماسىمەن جولداستىق ويىن وتكىزەتىن بولادى. كۋۆەيت ءامىرى ويىنعا قاتىسۋعا ءوتىنىش ايتادى. فۋتبولشى سوزىن جەرگە تاستاماي الاڭدا 20 مينۋت ويناپ شىققان. الFIFA بۇل ويىندى رەسمي ەسەبىنە تىركەگەن. وسىلايشا پلاتينيدىڭ كۋۆەيت قۇراماسى جەيدەسىن كيگەن ءبىر ويىنى بار.

2007- جىلى ميشەل پلاتينيUEFA پرەزيدەنتى بولىپ سايلاندى. 2015- جىلى قىزمەتىنە بايلانىستى داۋ-داماي شىعىپ، فۋتبولداعى قىزمەتتەن 8 جىلعا شەتتەتىلدى. كەيىننەن جازا مەرزىمى ايتارلىقتاي قىسقارتىلدى. قازىر حالىقارالىق كاسىپقوي فۋتبولشىلار قاۋىمداستىعىنىڭ(FIFPro) كەڭەسى قۇرامىندا.

ميشەل پلاتيني– France Football باسىلىمى تاڭداۋى بويىنشا XX عاسىرداعى ەڭ ۇزدىك فرانتسۋز فۋتبولشىسى.

«التىن دوپ» العان ءۇشىنشى فرانسۋز فۋتبولشىسى – جان-پەر پاپەن. بۇل ماراپاتقا 1991- جىلى يە بولدى.

ول 1988-1992- جىلدار ارالىعىندا فرانسيا چەمپيوناتىنىڭ ۇزدىك سۇرمەرگەنى اتاندى. ۇلتتىق قۇراما ساپىندا 1986- جىلعى ەۋروپا چەمپيوناتىندا قولا جۇلدە العان.

ءمانسابىن 1970- جىلى «جەمون» جاستار كومانداسىندا باستاپ، 2009- جىلى فرانسيانىڭ تومەنگى ديۆيزيونىنداعى كوماندالاردىڭ بىرىندە اياقتاعان. ەۋروپاداعى «ميلان»، «باۆاريا» جانە «بريۋگگە» كلۋبتارىندا ويناعان. فرانسيانىڭ «ۆالانسەن»، «وليمپيك مارسەل»، «بوردو» جانە «گەنگام» كلۋبتارىندا دوپ تەپكەن.

قازىرگى تاڭدا فرانسيانىڭ تومەنگى ديۆيزيونىنداعى «س شارتر» اۋەسقوي فۋتبول كومانداسىن جاتتىقتىرادى.

1998- جىلى فرانسيا ۇلتتىق قۇراماسى العاش رەت الەم چەمپيونى اتاندى. ءوز ەلىندە وتكەن جارىستا توپ جاردى. ءدال وسى جىلى «التىن دوپ» تا فرانسۋزدىق فۋتبولشىعا بۇيىردى. ول زيننەدين زيدان ەدى.

تانىمال فۋتبولشىنىڭ اتا-اناسى فرانسياعا 1953 جىلى الجيردەن كوشىپ كەلگەن. وتباسىنىڭ كەنجەسى.

1988- جىلى كاسىبي ءمانسابىن «كانن» كومانداسىندا باستادى. كەيىننەن «بوردو»، «يۋۆەنتۋس» جانە «رەال مادريدتە» جارقىن ويىنىمەن جۇرت نازارىندا بولدى. كلۋبتىق دەڭگەيدە ايتارلىقتاي جەتىستىك شىڭىن باعىندىردى.

ۇلتتىق قۇرامادا ويناپ الەم چەمپيونى (1998- جىلى)، ەۋروپا چەمپيونى (2000- جىلى) اتاندى. 2006- جىلى كۇمىس جۇلدە الدى. دال سول يتاليامەن بولعان فينالدىق ويىندا پەنالتيدەن بۋففون قاقپاسىنا گول سوقتى. ال ويىن اياقتالار تۇستا ماركو ماتەراتستسيدى باسپەن ۇرىپ، الاڭنان قۋىلعان ءساتى ءالى جانكۇيەرلەر ەسىنەن شىقپاسا كەرەك. وسىدان كەيىن سپورتتاعى ءمانسابىن اياقتادى.

زيدان 2009- جىلدان باستاپ «رەالدا» قىزمەت اتقارا باستادى. كوماندا پرەزيدەنتى فلورەنتينو پەرەستىڭ كومەكشىسى بولدى. ودان كەيىن سپورتتىق ديرەكتور مانداتىن الدى. 2012- جىلى بۇل قىزمەتىن جاستار كومانداسىنداعى جاتتىقتىرۋشىلىققا الماستىردى. ناتيجەسىندە وسى جولدى تاڭدادى.

2016- جىلى زيدان "رەالدىڭ" تىزگىنىن ۇستادى. ءۇش ماۋسىم ىشىندە كوماندامەن زور جەتىستىككە جەتتى. چەمپيوندار ليگاسىن 3 جىل قاتارىنان ەنشىلەپ، رەكورد ورناتتى. 2018- جىلدىڭ مامىرىندا قىزمەتىنەن كەتىپ، 2019- جىلدىڭ ناۋرىزىندا قايتا ورالدى. قازىر كوماندانى جاتتىقتىرىپ كەلەدى.

فۋتبولدان فرانسيا قۇراماسى ءوز تاريحىندا ەكى رەت الەم چەمپيونى اتاندى. ءبىرىنشى رەت زيدان ويناعان 1998- جىلى بولسا، اراعا 20 جىل سالىپ 2018- جىلى رەسەيدە وتكەن دوپ دوداسىندا توپ جاردى.

قاينار: يىنتەرنەتتەن | رەداكتور: اراي | كورىلىم : 313 رەت

  • نازارلارىڭىز بىزدە بولسىن

ءسىز قىزىعاتىن مازمۇندار


جۇڭگو جىلجىمالى حابارلاسۋ سەرىكتەستىگى

تەكشەمىزگە قوسىلىڭىز